Heitir Pottar - Hreinsun á síum
Fólk spyr oft hvernig á að hreinsa síuna í heita pottinum. Það er tiltölulega einfalt mál og reglan er sú að sían er hreinsuð í hvert skipti sem skipt er um vatn í pottinum.
Best er að eiga auka síu eða síupar ef potturinn hefur tvær síur. Önnur er þá tilbúin til notkunar meðan hin er í. Þegar skipta þarf um vatn, sem talið er hæfilegt á eins til tveggja mánaða fresti, er farið svona að:
- Slökkt er á pottinum og hann tæmdur
Óhreina sían er tekin úr og hrein sett í í staðinn
Potturinn er þrifinn, fylltur og ræstur á ný
Óhreina sían er smúluð með garðslöngu eða sturtuhaus, ofanfrá og niður eftir ytri hlið allan hringinn til að skola úr henni mestu óhreinindi. Gætið þess að nota ekki svo mikinn vatnskraft að sían falli saman eða rifni.
Sían er nú látin liggja yfir nótt í fötu með klórblöndu til að sótthreinsa hana
Sían er þrifin aftur á sama hátt með garðslöngu eða sturtuhaus
Sían er látin þorna vel og geymd til næstu skipta
Til eru ýmis hreinsiefni fyrir síur, en varist að nota sápu, sjampó eða önnur freyðandi efni og munið að slík efni eiga aldrei heima í nuddpottum.